CEBU, Philippines - Wa kapugngi ni WBO welterweight champion Manny “Pacman” Pacquiao ang pagpagawas sa iyang kasagmuyo sa usa ka sikat nga boxing writer kinsa padayung mipakatap og mga artikulo nga nag-awhag nga i-boycott sa mga boxing fans ang nagsingabot niyang away sa Mayo 7 didto sa Las Vegas batok ni Shane Mosley.
Sa iyang regular nga column sa Philboxing.com nga “Kumbinasyon”, si Pacquiao nagmakuli paghatag sa pangalan sa maong boxing writer, apan gisaway niya ang padayung pagdaot niini sa promosyon sa iyang away.
“Madali raw ang laban na ito kaya ‘basura’ raw, ani ng isang maimpluwensiyang writer na sa tingin ko ay hindi pa nakaranas ng totoong away o di kaya ay magsuot ng gloves o maglagay ng benda sa kamay,” matud pa ni Pacquiao.
Si Pacquiao kinsa manalipod sa ikaduhang higayun sa iyang WBO title, mihulagway sa maong writer nga sayup sa mga analysis niini ug wala kahibalo sa iyang gipangsuwat.
“There is never an easy fight. Every time I step into the ring, I risk my life and my future,”dugang pa ni Pacquiao kinsa nangandam na sa pagsugod sa iyang training didto sa Baguio City karong Marso.
Gihimo usab nga ehemplo ni Pacman ang nahitabong away WBO/IBO light heavyweight king Jean Pascal batok sa boxing legend nga si Bernard Hopkins, diin diriyot madisgrasya si Pascal batok sa 45-anyos nga si Hopkins. - BANAT NEWS