CEBU, Philippines - Si South District Congressman Tomas R. Osmeña maoy pinasidunggang mamumulong ug mopanumpa sa mga opisyales sa Cacoy Doce Pares World Eskrima Federation ugmang adlawa diha sa ilang headquarters sa dalan C. Padilla, ning siyudad.
Si Congressman Osmeña kanunay nagpaluyo sa mga kalihukan sa Doce Pares ilabi na kay ang iyang bugtong anak nga si Miguel usa man ka tinun-an ni Supreme Grand Master Ciriaco 'Cacoy' Cañete. Si Cañete nagpabilin gihapon nga presidente sulod na sa kapin sa 20 ka tuig. Ang maong grupo mihingan ni Cañete nga lifetime president.
Ang election sa Doce Pares gipahigayon niadtong Disyembre 30 dungan sa ilang tinuig nga Christmas party didto gihapon sa ilang headquarters.
Matud pa ni GM Cañete nga adunay daghang mga eskrima exhibitions nga himuon ugma sa gabii diin mopakita’g katakus ang iyang mga sakop lakip na ang iyang mga anak ug mga apo nga pulos maayo og pangamot.
Ang 91-anyos nga si GM Cañete, mopakita sab sa iyang katakus paggamit sa olisi ug ingon man pagdis-arma sa iyang kontra nga walay gikuptan nga hinabigan o “barehand” technique. - BANAT NEWS