3-in-1 boxing events sa ALA Promotions

CEBU, Philippines - Ang labing dakung boxing promotional outfit sa Asia nga mao ang ALA Promotions, mopasiugda'g tulo ka dagkung boxing event sa unang bulan sa 2011.

Una kining higayon sa kasaysayan sa Philippine boxing nga tulo ka major boxing events ang ipahigayon sud lang sa usa ka buwan.

Uban sa suporta sa ABS-CBN Sports ug Asia Brewery Incorporated, unang ilusad mao ang ALA-Cobra Tunay na Lakas “Boxings Best” karong Enero 15 diha sa Asiatown I.T Park sa Brgy. Apas, ning siyudad.

Sundan dayon kini sa ALA-Summit Natural Drinking Water "Fight Night Amateur Boxing Series" sa Enero 16 diha sa Gaisano Countrymall carpark.

 Ang ikatulo mao ang giatngan nga "Pinoy Pride 3-The Rematch" diin si ALA knockout artist Rey 'Boom Boom' Bautista moharong ni Alejandro 'Zorrito' Barrera sa Enero 29 diha sa Waterfront Cebu City Hotel and Casino.

Ang unang away nilang Bautista ug Barrera niadtong Agosto sa miaging tuig naputos sa mga kontrobersiya.

Atol sa ilang away sa "Philippines vs. the World" diha sa Waterfront, si Bautista maoy midaog human gihunong sa ring physician ang away sa fourth round dihang nakaangkon og dakung gisi sa kilay si Barrera nga matud pa sa mga hurado gikan sa kumo ni Bautista. Apan mi-insistir ang kampo ni Barrera nga ang gisi mugna sa accidental head butt. – BANAT NEWS