Doce pares election sa Dec. 30

CEBU, Philippines - Daw lisod tuohan nga sa iyang pangedaron nga 91 anyos, aktibo lang gihapon ang Doce Pares World Eskrima Federation lifetime president nga si Supreme Grandmaster Ciriaco "Cacoy" Cañete ug karong umaabot Huwebes, Disyembre 30 sa alas 5 sa hapon, laing usa na usab ka tuig ang isangon kaniya isip presidente sa Doce Pares atol sa ilang election ug general membership meeting didto sa ilang headquarter sa dalan C. Padilla, ning dakbayan.                   

Si Cañete nahimong presidente sa Doce Pares kaniadto pang tuig 1988 diin sila maoy mihulip sa iyang igsoon nga namatay nga si Eulogio "Yoling" Cañete og 22 ka tuig na siyang naghupot sa katungdanan.    

Ang mga opisyales nga mapili uban kang Cañete mo-asumir sa ilang katungdanan unya sa enero 8, 2011 human sa ilang induction. Nangita pa si SGM Cacoy ug personalidad nga himoong inducting officer apan segurado na gyud nga iyang dapiton si Cebu city Mayor Michael L. Rama kinsa usa ka supporter sa eskrima.

Aduna say pipila ka mga langyaw nga gikatakdang mobisita dinhi sa Sugbo atol sa induction ceremony. 

Si Cañete, nakadawat nag 13 ka Hall of Fame awards ug kadaghanan niini iyang gidawat didto sa Estados Unidos.

Aron dili siya magluya, si Cañete mitug-an sa Banat Sports nga kanunay lang gihapon siyang mag-ensayo tulo ka higayon matag semana ug usahay mohimo'g pipila ka sparring sessions.

Matod pa niya nga dili na unta buot ang iyang doktor nga maghago pa siya sa iyang lawas apan iyang gitubag ang iyang doktor nga mas bation siyan'g kaluya kung dili makagawas ang iyang singot.

Usa ka Swiss national ug usa sab ka Italian ang segurado nang motalbong tungod kay anaa sila nag-bansay bansay sa Doce Pares ubos ni John Mac.  - BANAT NEWS