Buenafe, Lanete tatanggap ng UAAP/NCAA PC Pivotal Player award
MANILA, Philippines - Sa ipinakitang husay lalo na sa championship series ay tatanggapin nina Ryan Buenafe at Garvo Lanete ang pagiging Pivotal Players Award mula sa UAAP at NCAA Press Corps sa Collegiate Basketball Awards sa Enero 17 sa Topaz I ng Gateway Suites sa Cubao, Quezon City.
Si Buenafe ay kikilalanin dahil tinulungan niya ang Ateneo sa paghablot ng ikatlong sunod na titulo sa UAAP nang talunin nila ang Far Eastern University sa dalawang magkasunod na laro.
Sa deciding Game 2 ng best-of-three championship series lumabas ang tikas ni Buenafe upang mapawi ang kawalan nito sa tamang kondisyon bago nagsimula ang liga.
Ibinagsak ni Buenafe ang 23 puntos at 10 rito ay ginawa sa huling yugto upang halos na mag-isa niyang sinagupa ang Tamaraws tungo sa 65-62 panalo.
Si Lanete naman ang nagbida sa San Beda nang gumawa ito ng makasaysayang 18-0 sweep sa NCAA.
Isa si Lanete sa mga sinandalang manlalaro ng koponan sa kabuuan ng liga nang maghatid ito ng 15 puntos, 6 rebounds at 3.5 assists.
Sa Finals ay kuminang rin ito nang ibagsak ang pamatay na tres sa Game 2 upang mapawi ang paghahabol ng Stags at makuha ang titulo sa bisa ng 70-65 itagumpay.
- Latest
- Trending
