Kickboxing sa Nangka

CEBU, Philippines - Dose ka paresan gikan sa walo ka clubs ang magsangka sa kulbahinam ug pisikal nga 1st Purok 3 Nangka Open Full-Contact Kickboxing Showdown karong alas-7:30 sa gabii diha sa Purok 3 Nangka basketball court sa Consolacion.

Ang walo ka clubs nga mosalmot naglakip sa Arcomjukai, Xanado Jujitsu, Muay Thai Bullets, FCK Streetfighters, Cubacub Martial Arts, APC Club, Highway Stars ug ang Tiger Hall.

Ang maong torneyo magsilbeng preparasyon alang sa umaabot nga National Muay Thai Showdown sunod buwan diha sa Cebu Coliseum.

Usa sab kini sa mga highlights sa kapistahan sa ilang mahal nga patrona Our Lady of Perpetual Help karong Disyembre 25.

Ang torneyo gipasiugdahan ni FO2 Chester Noel Congson, ang district president sa Purok 3, uban sa suporta ni Nangka Brgy. Capt. Rey C.G. Cataluña ug barangay councilor Neil Congson. Si 9 Dan Master Dann Diaz maoy show director. (BANAT)