Delos Santos mihawod sa Eagle Run 3

CEBU, Philippines - Gikan sa iyang ikalima sa 34th National Milo Finals, giladlad ni Mary Grace delos Santos ang tanan niyang kusog aron maangkon ang titulo sa final leg sa Eagle Run-Night Race niadtong miaging gabii didto sa   north reclamation area sa Mandaue City.

Una kining pagbalik ni Delos Santos sa Cebu running scene human sa pipila ka buwan niya nga pagpangandam alang sa Milo Marathon niadtong Disyembre 12 didto sa kaulohan.

Gitapos ni Delos Santos ang 10K women’s class sa oras nga 41:03.958, gisundan sa beteranang si Merlita Arias-Dunkin sa ikaduhang dapit sa oras nga 44:11.633 ug Virginia Parajenog sa oras nga 51:07.740.

Sa men’s open, ang kanhi trainer ni Delos Santos nga si Sherwin Managil mao ang miangkon sa titulo sa oras nga 34:25.867, samtang sila si Adonis Singson (34:30.049) ug Michael Largo (39:39.341) mao ang mga runners-up.

Nag-una sa SHS-S 10K Alumni class mao si Arnold Go sa oras nga 42:56.784, gisundan nila ni Nicole Louis Branzuela (48:50.538) ug Joe France Canizares (49:28.620) alang sa ikaduha ug ikatulong luna. 

Si Jordan Bacong (18:05.690) ug Princess Ville Villapaz (25:55.150) mao ang nidaog sa 5K Open, samtang sila si Jon Cliff Debulosan (10:13.460) ug Mary Joy Loberanis (12:56.870) mao sab ang hari ug reyna sa 3K fun run. (BANATSPORTS)