CEBU, Philippines - Giputol sa Cleveland Cavaliers ang ilang napulo ka sagunson nga pilde pinaagi sa ilang 109-102 nga kadaogan batok sa New York Knicks sa overtime nga nahimong birthday gift ngadto kang Mo Williams sa nagpadayong duwa sa National Basketball Association (NBA) didto sa Quicken Loans Arena sa Cleveland, Ohio.
Didto sa AT&T Center sa San Antonio Texas, midaog sab ang Spurs batok sa Memphis Grizzlies pinaagi sa overtime sa iskor, 112-106.
Samtang milanat sa overtime ang sangka tali sa Cleveland ug New York ug ingon man sa San Antonio batok Memphis, parehong naka-eskapo ang Miami Heat ug Portland Trail Blazers kinsa midaog og usa lang ka punto ug diriyot pa magka-parehas ang resulta—ang Heat midaog batok sa Washington Wizards, 95-94 ug ang Trail Blazers midaog batok sa Golden State Warriors, 96-95.
Na-upset sa LA Clippers ang host Chicago Bulls didto sa United Center sa iskor, 100-99 ug mao na sa ginhawang paningkamot sa Denver Nuggets aron mo-iskor og 115-113 nga kadaogan batok sa Minnesota Timberwolves.
Duha lang ka duwa ang mibiya og dako-dako dihang gipakaging sa Philadelphia sixers ang host Orlando Magic didto sa Amway Center sa iskor, 97-89 ug midaog sab ang Utah Jazz batok sa host Milwaukee Bucks, 95-86 didto sa Bradley Center.
Si Williams kinsa magsa-ulog sa iyang ika-28 nga adlaw'ng natawhan karong adlawa, maoy nangu sa Cavs sa iyang 23 puntos lakip na niini ang lay-up nga maoy nagtabla sa duwa atol sa regulation.
Ang Cavs nakahimo sab pagputol sa ilang labing taas nga losing streak niadtong 2002-03, ang maong season dihang ilang nakuha si LeBron James diin napilde una sila’g 15 ka sagunson nga duwa.
Mibahug sab og 14 ka assists si Williams kinsa naglaraw sa pagsaulog sa iyang adlaw'ng natawhan pipila ka oras sa wala pa ang duwa. Sa ilang mga pilde, kanunay ma-outscore ang Cavs ug 17.5 puntos apan sa kataposan nilang duha ka pilde, nagligas lang og sayis ngadto sa nuybe puntos.
“We’ve been right there. We showed our grit. We wanted to see some wins to start believing,” matud pa ni Williams.
Mao kadto’y labing unang daog sa Cavs sukad ilang gipilde ang Memphis kaniadtong Nobiyembre 27.