Rose Pharmacy chessfest

CEBU, Philippines - Magsinukdanay na sa ilang katakus ang mga Sugbuanong woodpushers sa ipahigayong Rose Pharmacy Chess King 2010 sugod karong alas-10 sa buntag diha sa Colonnade Chess Club.

Ang 7-round Swiss system competition seguradong hugopan sa mga tang-ang chess players dinhi sa Sugbu gumikan sa kadaku sa ganti nga mabulsa sa mga mananaog.

Ang kampiyon mouli bitbit ang P7,000, samtang ang second ug third placers makadawat og P5,000 ug P3,000 matag usa.

Ang fourth ug fifth placers makaangkon og P2,000 ug P1,000, samtang ang sixth hangtod sa 10th placers hatagan og P500 nga consolation prize matag usa.

Ang registration fee nagkantidad og P200. Alang sa dugang mga kasayoran, mahimong mokontak ni international arbiter Marvin Ruelan sa 0926-7352951. (BANAT NEWS)