Mikabat ngadto sa 40 ka teams ang misalmot sa Mambaling Inter-Sitio Basketball League nga gibuksan sa miaging Domingo didto sa Mambaling Sports Complex.
Sa kasaysayan, mao kini ang labing daku nga torneyo sa basketball sa barangay Mambaling tungod kay miabot ngadto sa labing menos 70 ka teams unta ang orihinal nga lista, apan wala na dawata ang uban tungod kay gawas nga dili kompleto ang ilang line-up, wala sab sila'y uniporme.
Katorse ka teams ang magsambunot sa seniors division ug laing 14 ka teams ubos sa juniors category ug adunay 12 ka teams sa 35-year old and above division.
Ang tanang teams sa tulo ka dibisyon gibahin ngadto sa duha ka brackets. Ang top-two teams sa matag bracket mo-abante ngadto sa crossover semifinals diin ang no. 1 team sa Group A makigsangka batok sa no. 2 team sa Group B, samtang ang no. 2 team sa Group A makigsangka sa no. 1 team sa Group B.
Ang modaog sa crossover semifinals maoy mag-abot sa best-of-three finals.
Ang liga gipasiugdahan sa bag-ong napiling konsehal nga si Emier Hamis uban ni Mambaling sports consultant Danny Duran. (BANAT NEWS)