Solmeat/VKK kampiyon sa LLBA Rollway Cup

Yano kaayong gilangkat sa Solmeat/VKK ang korona sa LLBA Rollway Inter-club basketball tournament pinaagi sa paglubong sa Gemmary Pawnshop, 86-60 didto sa Vilas Magallanes gym sa Sta. Lucia Property sa Lapu-Lapu City.

Pagsugod pa lang gani, ang Solmeat/VKK ni team owners Leo Bascon ug Victor Malingin mipahaguros dayon sa ilang nagbaga nga tirada aron ang Gemmary Pawnshop ni team manager Audi Medina ilubong og 16 puntos, 42-26 paghuman sa unang-tunga sa duwa.

Nakatag ang puntos sa Solmeat/VKK diin lima sa ilang players nga gipangulohan ni Rene Daño ang mi-iskor og double figures pinaagi sa iyang 15 puntos. Ang iyang sangay nga si Rene Cuadra mitikdol og 13 puntos, samtang ang kanhi SWU Cobra nga si Dandan Ramos uban nilang Diego Tampus ug Jojo Basmayor miariya og 12 puntos matag usa nga nakatampo sab sa pag-inat sa labaw ngadto na sa 20 puntos paingon sa final period.

Wala kaayo maka-arte sila si Buldog Ybañez ug Noli Paquibot ug igo lang silang nagkumboya og 15 puntos, apan bisan pa, nakahimo gihapon ang Solmeat/VKK pagmintinar sa ilang double digits nga labaw hangtod nga nahurot ang oras sa ilang duwa.

Ang kanhi UC Webmaster nga si Julius Gastador maoy topscorer sa Gemmary Pawnshop pinaagi sa iyang 23 puntos, apan anugon lang ang iyang paningkamot kay wala kini makakuha og maayong suporta gikan sa iyang kaubanan.

PUNTOS MATAG USA

SOLMEAT/VKK (86) - Daño 15, Cuadra 13, Ramos 12, Tampus 12, Basmayor 12, Ybañez 8, Paquibot 7, Lazaraga 7

GEMMARY (60) - Gastador 23, Salimbangon 10, Eya 10, Gilbuena 8, Gonzaga 4, Medina 2, Cabigas 1, Hermo 1 (BANAT NEWS)