Bautista mag-inutok na

CEBU, Philippines - Buot niyang ipamatuod nga ang iyang miaging kadaugan dili lang tungod sa usa ka "controversial stoppage," ang ALA Boxing Gym stalwart nga si Rey 'Boom Boom' Bautista misaad nga mohimo'g usa ka impresibong kadaugan sa iyang "rematch" batok ni Alejandro 'Zorrito' Barrera sa Mexico sa main event sa "Pinoy Pride 3" sa Enero 29 sunod tuig diha sa Waterfront Cebu City Hotel and Casino.

Atol sa ilang unang engkuwentro sa "Philippines vs. the World" sa miaging Agosto 28, si Bautista nakasugat og lisud nga away, apan ang Boholanong boksidor nakaikyas sa usa ka kuwestiyonableng fourth round TKO dihang gihunong sa ring physician ang away tungod sa gisi sa kilay ni Barrera.

"There’s no question that there will be a lot of fireworks in this fight," matud pa ni ALA Promotions president Michael Aldeguer kagahapon atol sa press conference   diha sa Sports Exchange Bar and Grill. "We want that rematch for Boom Boom, Barrera’s camp wants a rematch and also the fans want it."

Giangkon ni Bautista (29-2, 22KOs) nga nakahimo siya og sayop atol sa unang away tungod kay nasubrahan ang iyang kaagresibo aron maka-iskor og knockout nga nakahatag og higayon ni Barrera (21-4, 14KOs) nga makapasulod og mga solidong kombinasyon.

"Kaya raman nako ang iyang kumo, pero nanubra ra ko ka agresibo nga maka-knockout mao nang wa ko kabantay sa iyang mga kumo kung diin gikan," matud pa sa featherweight contender nga si Bautista.

Apan ning higayona, si ALA trainer Edmund Villamor miingon nga si Bautista mag-inutok na sa iyang away batok ni Barrera.

"Karon naa mi idea. Gitan-aw namo ang tape sa away ug kabaw nami sa among buhaton," si Villamor nagkanayon. "Ang ako lang ikasulti   ni Boom Boom mao nga dili siya magpataka og sumbag ug mo-focus ta sa defense," dugang pa niya.

Sa undercard, masukod na usab ang katakus ni WBO Asia-Pacific Youth lightweight champion Jason Pagara (24-1, 13KOs) sa iyang pakigsangka batok ni Billy Sumba (18-2, 4 KOs) sa Indonesia.

Paningkamotan ni Pagara nga makapakita og nindot nga away aron mahinayon ang plano sa ALA nga ipadala siya ngadto sa Estados Unidos aron mopaubos og extensive training ubos sa Top Rank Inc.

Sa laing bahin, ang kanhi WBC silver flyweight champion Edrin 'The Sting' Dapudong (20- 3, 11KOs) mohimo sa iyang debut ubos sa ALA Promotions batok ni Sofyan 'The Cobra' Effendi (10-10, 8KOs) sa gikatakda nilang 10 ka hugna nga binakbakay, samtang si bantamweight prospect Roli Gasca (15-1, 3KOs) tinguha nga makapakita og nindot nga away batok ni Joash Aparecio (7-3, 4KOs) sa Cagayan de Oro City. (BANAT NEWS)