CEBU, Philippines - Gisugdan na ang registration sa Time Out Basketball Clinic nga sugdan karong Disyembre 18 diha sa Cebu Coliseum.
Sa registration fee nga P1,000, ang matag partisipante makadawat na og libreng jersey ug bola.
Pagadumalaon ni kanhi Cebu Gems assistant coach Rex Salvaña, ang usa'g-tunga sa bulan nga training camp bukas sa mga bata nga nag-edad og 17 anyos.
Ang extensive training program gibahin sa duha ka levels -- ang beginners gikan sa alas-8 hangtod sa alas-10 sa buntag ug ang advanced gikan sa alas-10 sa buntag hangtod sa alas-12 sa udto.
Atol sa clinic, ang mga bata tudloa'g fundamentals sa maong matang sa paugnat sa kusog sama sa dribbling, passing, shooting, footwork, on-court communication, defensive ug offensive strategies ug uban pang mga importanteng elemento sa basketbol.
Ang value formation ilakip sab sa training module aron tudloan ang ilang tinun-an dili lang aron mahimong maayong atleta kun dili mahimo usab nga usa ka disiplinado nga indibidwal.
Alang sa dugang mga kasayoran, niadtong interesado magpakisayod mahimong motawag o di ba text sa 0933-4675922 or 0905-6554203. – BANAT NEWS