Talk N' Text maoy No.1

CEBU, Philippines - Human maseguro ang twice-to-beat advantage sa quarterfinals, milampos usab kagahapon ang Talk N’ Text Tropang Texters pag-angkon sa No.1 seed dihang ilang gilumsan ang Air21 Express, 103-89, sa final elimination round didto sa Araneta Coliseum.

Nakuha sa Texters ang ika-11 nga daog uban ang tulo ka pilde nga maoy mitabla sa ilang standing sa San Miguel Beermen kinsa aduna usay 11-3,win-loss record, apan ang Texters ni coach Chot Reyes mao ang miangkon sa top seed tungod kay aduna silay mas taas nga quotient kaysa sa Beermen.

Ang Tropang Texters nagkupot og 1.05 percent, samtang ang San Miguel aduna lay 0.951 winning percentage.

Human sa sikit nga duwa sa unang duha ka kuwarter, nag-wild ang Texters sa second half sa pagpangulo ni kanhi MVP Kelly Williams kinsa mibubu sa kinatibuk-an niining 15 puntos sa third period alang sa 17 puntos nga labaw, 68-51.

Miposa usab og 13 puntos si Ryan Reyes, samtang ang beteranong sentro nga si Ali Peek midukduk og otso puntos, lima ka rebounds ug tulo ka blocks.

Sa ilang bahin, ang naparot nga Air21 magduwa karon sa ikapito o ikawalong dapit diin kinahanglan nila nga mudaog og ikaduha ka higayun aron makuha ang semis series batok sa Texters o sa San Miguel sa quarters. – BANAT NEWS