6th GUV Cup quarterfinals sugdan karong adlawa sa CICC

CEBU, Philippines - Mosulod na sa crucial stage ang kompetisyon sa 6th Governor Gwen Garcia Unity Volleyball (GUV) Cup sa dihang ang aksiyon sa quarterfinals mosikad karong alas-8 sa buntag diha sa Cebu International Convention Center (CICC) sa Mandaue City.

Sa unang duwa, ang municipal women's champion Catmon moharong sa Tuburan ug sundan kini sa duwa tali sa Liloan batok sa Barili, Mandaue batok Alegria, Talisay batok Pilar ug Minglanilla batok Tabuelan.

Sa men's division, ang Minglanilla makigsambunot batok sa Barili, ang Liloan moharong sa Carmen, ang reigning City Cluster champion Mandaue makigbatok sa Sta. Fe, ang Talisay makigtigi sa Bogo ug ang Alcoy makigbugno sa Poro.

Ang quarterfinals molungtad hangtod sa Huwebes. Ang semifinals gitakda karong Biyernes, samtang ang championships duwaon inig Sabado.

Gawas sa customized trophies ug medals, ang kampiyon sa matag kategoriya makadawat og P100,000 matag usa, samtang ang runners-up mobulsa og P50,000. – BANAT NEWS