SWU abante sa semis sa PRISAA boxing event

CEBU, Philippines - Wala mosalir ang mga paningkamot sa mga bisitang boksidor gikan sa Bohol dihang giharos sila sa Southwestern University (SWU) boxers sa semis sa Regional PRISAA Boxing Competition niadtong miaging adlaw diha sa Cebu City Sports Center (CCSC).

Ubos sa giya ni coach Jordan Dopalco sa Cebu City Sports Center (CCSC) stable, tulo ka mga sakop sa SWU Cobras nga sila si Ian Refuela (sa flyweight),   John Kenan (bantamweight ) ug Zoro Mabel sa (featherweight) ang miladlad sa tinagoan nilang abilidad aron palagputon ang mga boksidor sa Bohol.

Apan sukwahi sa iyang mga teammates, pakyas si Allan Refuela pag-abante sa finals dihang gilupig siya pinaagi sa puntos batok ni Dannlou Codilla sa University of the Visayas (UV).

Ang upat ka mga boksidor seguradong nakakuha na og katungod aron morepresentar sa Sugbu alang sa PRISAA National Games sa Pebrero 20-26 sunod tuig dinhi sa Sugbu. – BANAT NEWS