Lola Tikya, JJ-Ann daog sa S2BAA

CEBU, Philippines - Gibaswat sa abtik ug dangog nga shooting guard Rondyll Roncal ang Lola Tikya ni Dodong Elizalde aron mokulit og 96-81 nga kadaugan batok sa YMTEC, samtang ang JJ-Ann naka-ipsot batok sa Masong Bros., 81-78 niadtong Domingo sa elimination round sa Sambag-2 Basketball Athletic Association (S2BAA) 2010 Christmas basketball tournament didto sa sitio Kawayan covered court.

Nagtabla ang duha sa halftime, 38-all, apan kalit nanginit ang Lola Tikya sa third period dihang ilang na-outscore ang YMTEC, 24-12 ug wala na kini molingi pa gikan niadto hangtod nga nahuman ang duwa.

Si Roncal mibahog og 35 puntos aron pangulohan ang Lola Tikya, samtang sila si Teyoy Lim ug Alie Yu mi-iskor sab og double figures sa ilang 13 ug 12 puntos, matag usa.

Si Elizalde maoy nangu sa YMTEC pinaagi sa iyang 30 puntos. Sila si ex-USJ-R Jaguar Jerry Billota ug Bebot Ancot nagkumponga og 25 puntos.

Sa main game, nahimong bayani si kanhi-CIT Wildcat Jumel Lanutan dihang mi-iskor siya’g krusyal nga three-point play sa daginutong oras aron luwason ang JJ-Ann, kinsa nabiyaan og uno punto, 77-78 sa katapusang otso segundos human sa basket ni Dodong Kintanar.

Si Lanutan miposa og 20 puntos, gisundan ni Dennis Borinaga sa iyang 15 puntos aron pangulohan ang JJ-Ann. Sila si Voltaire Rosal ug Kokoy Sandalo miamot og 10 puntos matag usa sa maong kadaugan.

Ang Masong Bros. gipangulohan ni Noel Piquero, kinsa miburak og 20 puntos, si Cris Labajo miamot og 15 puntos. (BANATSPORTS)