MIAMI--Umiskor si Chris Bosh ng 27 points, habang may 26 si Dwyane Wade para igiya ang Miami Heat sa 89-77 paggupo sa Atlanta Hawks para sa kanilang ikaapat na sunod na panalo.
“It’s just a better feel in the locker room, away from the game, but also on the basketball court,” ani Wade.
Nagtulong sina Bosh, Wade at LeBron James sa atake ng Heat, may 13-8 rekord, sa fourth quarter matapos ilista ang 81-72 lamang matapos makalapit ang Hawks sa 72-74 sa 4:39 nito.
Ang anim na mintis ng Atlanta ang tuluyan nang nagbigay sa Miami ng panalo.
Sa Philadelphia, nagtala si Jodie Meeks ng career-high 26 puntos, kabilang ang 20 sa malaking atake sa first quarter at tinalo ng 76ers ang Charlotte Bobcats, 109-91.
Sa Minneapolis, naglista si Kevin Love ng 28 puntos at 19 rebounds upang tulungan ang Minnesota na wakasan ang kanilang anim na dikit na kabiguan sa bisa ng 128-95 panalo laban sa Cleveland.