CEBU, Philippines - Wala mosalir ang gihimong rally sa University of Cebu (UC) Webmasters sa fourth period kay napukan kini ngadto sa Dela Salle University Green Archers, 71-82 ug mipahiluna sa ikaupat nga puwesto sa Philippine Collegiate Champions League (PCCL) kagahapon didto sa Ninoy Aquino Stadium.
Gilubong og 35 puntos ang Webmasters sa third period, 31-66, apan nakan-an ang maong labaw ngadto na lang sa nuybe puntos, 69-78 pinaagi sa ilang 40-12 run sa katapusang dos minutos sa duwa.
Ang lig-on nila nga depensa maoy daku'g natabang hinungdan nga nakaapas kini, apan didto ra kutob ang maayo nilang kumbati kay nahutdan kini sa oras.
Sa maong kapildihan, ang 2010 Cebu Schools Athletic Foundation Inc. (CESAFI) champion nga Webmasters nakadawat og P50,000 nga balor og athletic items ug scholarship grants alang sa eskuwelahan ug laing P50,000 nga balor sa
gift certificates alang sa mga players ug sakop sa team.
Si Sam Marata kansang pamilya gikan sa Iligan City, maoy nangu sa Archers ug mao sab ang napiling best player of the game pinaagi
sa iyang 18 puntos ug milangkat og pito ka rebounds ug mihatag sab og pito ka assists. – BANAT NEWS