Pepito andam na sa iyang away

CEBU, Philippines - Manulong ang Sugbuanong si Jestoni Pepito sa balwarte sa iyang kontra uban ang paglaum nga modaog sa Philippine Boxing Federation (PBF) super bantamweight title batok ni Jason Egera karong Nobiyembre 30 didto sa Siaton, Negros Oriental.

Laraw usab ni Pepito nga makarekober human sa unanimous decision niya nga kapildihan ngadto ni Alvin Maquiling niadtong Agosto didto sa Sibonga. Mao usab si Egera, kinsa nagtinguha sab nga mobangon human mapilde ni Roli Gasca sa ilang non-title fight niadtong Hulyo didto sa Gaisano Countrymall carpark.

Sa supporting bout, ang walay pildeng PBF super flyweight king nga si Marco Demecillo Singwangcha sa Sugbu manalipod sa iyang bakus batok ni Rogen Flores sa Zamboanga City.

Nailog ni Singwangcha ang iyang bakus human sa iyang unanimous decision nga kadaugan batok ni Dondon Jimena niadtong Septiyembre diha sa Punta Princesa, ning siyudad.

Unom ka paresan ang mokompleto sa maong boxing card nga gipasiugdahan sa lokal nga kagamhanan sa Siaton pinangulohan ni Mayor Abert Ator uban sa suporta sa Singwangcha Promotion ug Rex 'Wakee' Salud (RWS) International Promotions.  (BANATSPORTS)