Tallo moduwa sa UAAP sunod tuig

CEBU, Philippines - Gipahibalo ni Ateneo Alumni Association (AAA)-Cebu Chapter president Jack Huang nga ang 2009 Cebu Schools Athletic Foundation, Inc. (CESAFI) MVP nga si Mark Jayven Tallo moduwa sa Ateneo Blue Eagles sa umaabot season sa UAAP.

Si Tallo, kanhi top gunner sa Cebu Institute of Technology (CIT) Wildkittens, nahimo sab nga MVP sa JR NBA.

Matud ni Huang nga si Jayven, anak ni kanhi pro Mark Tallo, mosugod og praktis isip sakop sa Blue Eagles karong summer.

Siya maoy responsable sa Wildkittens pagkulit og school record pinaagi sa pagdaog sa CESAFI juniors crown sa miaging tuig dihang ilang gipukan ang University of San Jose-Recoletos (USJ-R) Baby Jaguars sa ilang best-of-five finals.

Ang batan-ong si Tallo, usa sa mga coaching staff sa juniors champion Cebu Eastern College (CEC) Dragons, wala moduwa sa 2010 CESAFI season tungod sa residency rule. – BANAT NEWS