CBM swimmers andam na's National G-League

CEBU, Philippines - Nagpanikad na ang lima ka swimmers sa Cebu Blue Marlins (CBM) Swimming Club sa National G-League Age Group Swimming Championship karong Biyernes didto sa Trace Aqua Sports Center sa Los Baños, Laguna.

Ang mga pambato sa CBM makigtigi batok sa 70 ka koponan lukop nasud diin 500 swimmers ang mopakita'g aksiyon ning tulo ka adlaw nga kompetisyon.

Matud pa ni CBM coach Rolando Alvarez nga lima lang ka swimmers ang ilang ipadala tungod sa financial constraints.

Ang managsuong Navarro nga sila si Anthony Linn ug Lyh Ann sa Cebu Eastern College (CEC) mowadwad sa 12-under class.

Si Anthony Linn, gibayaw isip outstanding swimmer sa miaging tuig sa 11-under bracket. Ning higayona, magsagubang kini og lisud nga hagit batok ni RP Youth top swimmer Mark Rominquit sa Valleverde Aqua Lacer Swimming Club sa 400m freestyle, 200m backstroke ug sa 200m individual medley.

Sa laing bahin, si Michael Ichiro Kon sa FBC Christian School mopakita'g aksiyon sa 12-under boys, samtang si Aaron Grant Embuscado sa University of San Carlos-North Campus ug si Beth May Arellano sa University of Cebu mobanat sa 14-under category. (BANAT)