Grizzlies nakabihag

CEBU, Philippines - Nakapasulod og buzzer-beating fadeaway jumpshot si Rudy Gay atubangan ni LeBron James aron baswaton ang Memphis Grizzlies ngadto sa kulba-hinam kaayong 97-95 nga kadaogan batok sa Miami Heat kinsa miduwa nga wala si Dwyane Wade kagahapon atol sa nagpadayong 2010-2011 NBA season didto sa FedEx Forum sa Memphis, Tennessee. Ang hansak ni James maoy mitabla sa duwa sa ika-12 nga higayon sa duwa human ma-ilog ni Eddie House ang bola gikan ni Gay sa nahibiling 5.5 seconds apan mibawos si Gay pinaagi sa iyang winning 13-footer nga jumpshot atubangan gyud sa bench sa Miami aron putlon sa Grizzlies ang ilang lima ka sunod-sunod nga pilde.

Gi-review sa mga game officials ang maong tirada ug dayon mihukom nga usa kadto ka buzzer-beater. 

Wala moduwa si Wade tungod nay napiang ang iyang pulso kaniadtong Biyernes. Si Udonis Haslem wala sab makatiwas og duwa tungod sa iyang piang sa tiil may 1:25 ang oras sa third quarter diin giyayongan siya pagawas sa korte ngadto na sa ilang locker room apan nagpakita nga negatibo ang X-rays ug usab pa kini'g tan-awon karong adlawa. 

Si James maoy nangu sa Heat sa iyang 29 puntos ug 11 ka assists ug si House mikulit og season-high 20 puntos alang sa Heat diin nabugto ang ilang upat ka sagunson nga daog. Si Chris Bosh mi-iskor sab og 20 puntos. 

Naglabaw sa kataposang higayon ang Miami human sa three-point play ni James, 90-87 may 3:09 ang nahibiling oras sa duwa.  

Ang guard nga si Mike Conley naka-igo og layo nga jumpshot ug nabawi sa Grizzlies ang labaw human misukli og otso puntos nga naglakip sa lay-up ni Gay sa kataposang 38.5 segundos sa duwa. 

Gitubag kini ni Bosh ug three-pointer ug dayon giilogan ni House si Gay aron molampos ang Heat pagtabla sa duwa pinaagi sa dunk ni James. 

Midaog lang gihapon ang Grizzlies bisan pa ug gi-bangko ni coach Lionel Hollins ang ilang duha ka starters nga sila si Zach Randolph ug O.J. Mayo ug usa ka quarter isip silot quarter tungod kay uwahing mipatim-aw atol sa ilang pregame shootaround.

Si Darrell Arthur ug ang rookie nga si Xavier Henry maoy misulod isip starters hulip sa ilang lugar. Si Arthur miposa og 12 sa iyang 14 puntos sa first quarter aron tabangan ang Grizzlies paglabaw og labing menos 11 puntos. 

Hinoon, si Randolph lang gihapon maoy nangu sa Memphis pinaagi sa iyang 21 puntos ug 13 ka rebounds. Sila si Conewly ug Gay miamot og 16 points ug 15 puntos matag usa og si Marc Gasol midugang og 11 puntos alang sa Grizzlies kinsa naghupot na karon og 5-9 nga baraha.  

Ang hilanat ni Wade maoy nagpugos kaniya nga dili lang moduwa kagahapon ug si coach Erik Spoelstra mipalingkod kaniya tungod sa piang sa iyang walang pulso atol sa ilang kadaogan batok sa Charlotte sa miaging adlaw.

Ang duha ka teams nagtabla sa 20 ka higayon sa second half ug nagtabla sa 11 ka higayon.

Sa laing duwa, naka-ipsot ang Orlando batok sa Indiana, 90-86, gilubong sa Charlotte ang Phoenix, 123-105, midaog ang Dallas batok sa Atlanta, 98-93, midaog ang San Antonio batok sa Cleveland, 116-92, gipatapsingan sa Oklahoma ang Milwaukee, 82-81, midaog ang Utah batok sa Portland, 103-94, naka-ipsot ang Denver batok New Jersey, 107-103 ug midaog ang New York batok LA Clippers, 124-115