CEBU, Philippines - Nakarekober ang University of San Carlos (USC) Warriors gikan sa ilang double-digit nga biya sa third quarter ug dayon milusad sa ilang walay puas nga opensa aron mataktak ang University of the Visayas (UV) Green Lancers, 71-64 sa Sweet 16 Finals sa Philippine Collegiate Champions League (PCCL) Cebu Basketball Festival kagahapon diha sa Cebu Coliseum.
Gilubong og 13 puntos sa nanghinapos nga bahin sa third quarter, 36-49, ang Warriors mihimo'g kausaban ug mitubag sa buot nga ipatuman ni coach Mike Reyes.
Sa final period, hinay-hinay nga napugngan ang opensa sa Lancers tungod sa grabeng depensa sa Warriors, kinsa miharos sa Vis-Min Zonal eliminations niadtong Martes.
Nabiyaan na sab og 12 puntos ang Warriors, 47-59, kortesiya sa sunod-sunod nga triples nilang John Michael Abad ug Eman Calo, apan milusad kini og 10-0 nga rally aron pahakan ang labaw ngadto na lang sa dos puntos, 57-59 sa nahabiling 7:02 sa duwa.
Laing duha ka puntos gikan ni Sam Hermosa, kinsa maoy nangulo sa Warriors pinaagi sa iyang 25 puntos, maoy mihatag sa koponan og dos puntos nga labaw, 61-59.
Hinuon, nailog og balik ang labaw sa Lancers, 64-61 human sa triple ni Phil Mercader sa nahabiling 3:27 sa duwa, apan si Hermosa miposa og tres aron tablahon ang iskor, 64-all.
Ang Warriors milansang sa katapusan nilang siyete puntos sa duwa ug ang Lancers wala na maka-iskor pa hangtod nga nahurot ang oras sa duwa.
Sa main game, ang University of Cebu (UC) Webmasters milubong sa bisitang University of Iloilo Wildcats, 96-66 ubos sa pagpangulo ni 6-foot-9 Junemar Fajardo.
Ang sangka karong adlawa tali sa Warriors ug Webmasters magsilbeng preliminary game sa FEU-JRU game uban sa winner nga moabante ngadto sa Final Four sa kaulohan.
Si Fajardo mi-iskor og 14 puntos alang sa Webmasters, samtang ang Wildcats gipangulohan ni Bernard Tibor sa iyang 17 puntos. – BANAT NEWS