MANILA, Philippines - Pinataob ng Royale Business Club ang Manuel Luis Quezon University, 122-93 at isaayos ang kanilang paghaharap sa semifinal ng defending champion Wang’s Club sa 2010 MBL invitational basketball championship sa RTU gym sa Mandaluyong City.
Inilabas ni Jaymo Eguilos ang kanyang pinakamahusay na laro upang trangkuhan ang Royale BC sa maningning na panalo laban sa Stallions sa kanilang knockout game sa nine-team tournament na suportado rin ng Smart Communications, Dickies Underwear, WG Diner at PRC Courier Services.
Sa kabilang dako, kailangan ng Royale na dalawang ulit na talunin ang Wang’s upang makapuwesto sa kampeonato.
Tampok sa isa pang semis match ang sagupaan ng topnotcher na Hobe Bihon at Star Group of Publications.
Nakapasok ang Star na ginagabayan ni coach Rene Recto at manager Mike Maneze sa semis matapos na manalo via walkover makaraang umatras ang Lyceum of the Philippines upang ipokus ang kanilang atensyon sa kanilang kampanya sa Philippine Collegiate Champion’s League (PCCL).
Tinapos ng Hobe ang elimination sa 7-1 win-loss slate at taglay nila ang twice-to-beat advantage laban sa Star na magsisimula ngayong araw ang semis.