Ocañada, kaubanan nakadepensa sa titulo

CEBU, Philippines - Nadepensahan sa Wennie Ocañada ug kaubanan ang ilang four-man team title sa Cebu City Inter-barangay Darts League nga uloha'g "Mayor Michael Rama Cup" diha sa Yayoy's Grill and Resto Bar sa Orchids Street sa Brgy. Capitol Site, ning siyudad.

Sa ilang lig-on karon nga line-up itandi sa miaging tuig, ang team sa pagpangulo ni Ocañada miposte og yano kaayong 9-4 nga kadaugan batok ni Ertong Badayos ug kaubanan.

Laing sakop ni Ocañada mao sila si Tevan Montenegro, Boy Campugan, Atan Rubi ug Junex Perez, samtang sa habig ni Badayos mao sila si Yoko Quilope, Arvic Recaña, Molet Patunob ug Joseph Quindo.

Sa laing bahin, sila si Alvin Villa, Nilo Janson, Jun-Jun ug Roy Wenceslao mibira og 9-2 nga kadaugan batok sa bugtong female darter Anafe Villa uban nilang Gil Arco, Wenie Abella, Jerous Ponce ug Raniel Sansona aron angkonon ang ikatulong dapit. – BANAT NEWS