Bungot ray kuyaw

Gilatid na gyud tingaling daan sa iyang kapalaran nga mahimong Congressman o Representante sa katawhan kini si Manny Pacquaio kay karong panahona iya nang nakompleto ang plate number sa iyang sakyanan nga numero 8 human niya makuha ang iyang ikawalong world title atol sa World Boxing Council (WBC) superwelterweight championships.

Nakuha na niya kagahapon ang otso-otso dihang iyang gipilde si Antonio Margarito, ang gitawag og "Tijuana Tornado" apan ang tornado mikalma didto sa Cowboys Stadium sa Dallas, Texas dihang gipauwanan siya’g kinumo sa "The Boxing Congressman" nga si Pacquiao.

Gani, daghan ang nagtuo nga sayong matumba si Margarito tungod kay sa ikaupat pa lang ka round, nagisian na siya sa iyang tuong aping ug gawas pa niana, nagsunggo pa gyud. Ang uban niyang cornermen mibutang og pomada sa iyang samad ug ang uban nagpahid og tualya sa iyang ilong.

Makaloluoy kaayong tan-awon si Margarito nga susama kang Miguel Cotto sa miaging tuig, gihimo sab ni Pacquiao nga punching bag. Apan nakadayeg ako kang Margarito kay misustenir siya ug miabot gyud og 12 ka rounds diin si Pacquiao midaog pinaagi sa unanimous decision.

Mihulga unta og sumbalik si Margarito sa ikaunom ka round dihang nakahigayon siya’g dala ni Pacman ngadto sa daplin sa ring aron adto unta niya dabodabohan, apan abtik kaayong naka-eskapo ang nauwahi. Gikan niadto hangtod na sa ika-napulo ka round, ganado na kaayo ang mga Pinoy boxing fans kay sa puntos lang daan, daku na kaayo’g napundo si Pacquiao.

Dihay usa ka higayon nga gipahunong makadiyot ang duwa kay gitan-aw kun unsa kalawom ang samad ni Margarito, apan maisugon gyud ang Mehikiano nga motiwas sa away. Wala man tuod siya matumba, apan ang iyang nawong halos dili na mahitsura ug diyutay na lang ang kuwang nga masirado na ang tuo niyang mata, samtang ang usa nag-anam na sab og burot.

Suwerte si Margarito nga milahutay ngadto sa 12 ka round ug daghan ang nagtuo nga gituyo kadto ni Pacman kay basin ang pustaanay didto sa America nga walay mahitabong knockout. Kun imong tan-awon, daw sa naluoy na lang si Pacman pagkulata kang Margarito.

Kun nahitabo pa nga didto ako sa ringside sa maong sambunot, akong pangunayan og ihap kun pila gyud ka bungot ang naibot sa suwang ni Margarito, ang tornadong kalmado.

* * *

Ang akong higala nga si Lorenzo 'Chao' Sy mipahibalo ngadto sa mga mahiligon kaayo’g sabong nga aduna siya’y promosyon nga 4-Stag combination derby karong Nobiyembre 27 diha sa Banawa Century Game Club.

Ang pot money P4,400 ug ang cash prize P300.000.

Gipaneguro ni Chao nga patas ang matching niini ilabi na kay siya isip usa ka promoter, dili moapil ug wala siya’y entry.

Matud pa ni Chao nga usa kini ka “free for all” nga matang sa derby ug iyang giawhag ang sabungero sa pagdala o pagsalida sa ilang labing maayong manok atol sa maong derby aron makit-an kini sa mga Sugbuanon.

* * *

Miscellaneous. I witnessed the Pacquaio-Margarito fight at the residence of my friend Mike Sususco, finance officer of the San Miguel Shipping and Lighterage Corporation in Mandaue City. Among those who were present were Surigao del Norte Provincial Administrator Romy Cal as well as Arlene Tongco.

Congratulations to Grandmaster Max Caballes, coach of UC Arnis Team delegation who won the overall championships in the recently-concluded Central Visayas Regional Athletic Association (CVRAA) regional sports competitions in Dumaguete City. The UC eskrimadors won in both the elementary and high school divisions with 17-gold, 5-silver and 3-bronze medals.