MANILA, Philippines - Sinagip ng mga panalo nina Richie Mepranum at Dennis Laurente ang kabiguan ni Juan Martin “Bai” Elorde, ang apo ni boxing Hall of Fame inductee Gabriel “Flash” Elorde.
Tinalo ni Mepranum, ang dating World Boxing Organization (WBO) flyweight title challenger si Anthony Villareal ng Peris, California via split decision mula sa kanyang 58-56, 58-56, 56-58 scores sa kanilang six-round bout.
May 17-3-1 win-loss-draw ring record ngayon si Mepranum kasama ang 3 KOs, kumpara sa 10-4-0 (5 KOs) card.
Umiskor naman ang beteranong si Laurente (36-3-5, 18 KOs) ng isang eight-round unanimous win laban kay Rashad Holloway (11-2-1, 5 KOs) ng Raleigh, North Carolina sa kanilang welterweight fight.
Si Holloway ang palagiang sparmate ni Manny Pacquiao.
Binugbog ni Laurente si Holloway sa first hanggang six round mula sa kanyang mga overhand lefts at right hooks patungo sa kanyang 77-75, 79-73 at 78-74 scores.
Natalo naman si Elorde (12-1-0, 11 KOs) kay Angel Rodriguez (5-4-2) ng Houston via unanimous decision sa kanilang four-round lightweight fight.
Kinuha ni Rodriguez ang mga 40-36, 40-36 at 39-37 scores laban kay Elorde.