"Run to the Power of 3" karong Disyembre 5
CEBU, Philippines - Nagkagrabe na karon ang pagsanay sa lumba sa dagan dinhi sa Sugbu kay ning bag-o, usa ka religious sector ang mopasiugda og lumba nga ulohan og “Run to the Power of 3’ karong Disyembre 5 diha sa Park Mall carpark sa Mandaue City.
Ang Buddha Light International Association (BLIA)-Cebu Chapter uban sa main presentor San Miguel Incorporation, milusad og lumba nga mopaambit sa pilosopiya sa Buddhism.
"Aron makahimo ka og paghuna-huna'g maayo sa imong isig kataw, kinahanglan ka nga adunay maayong panglawas ug mao na ang rasun sa pagpasiugda namo sa lumba," matud ni Erwin Go, ang vice-president for education sa BLIA-Cebu Chapter atol sa press conference kagahapon didto sa Fo Guang Shan Chu Un Temple diha sa V. Rama Avenue, ning siyudad.
Gibana-banang 3,000 ka runners ang gilauman mosalmot sa maong lumba bisan og aduna kini kadungan nga duha ka lumba.
Rason sa kompiyansa sa mga organizers mao ang dul-an sa P100,000 nga ganting salapi ug San Miguel products nga madawat sa top 20 runners sa 10K, 5K ug 3K races.
Gawas sa singlet, race number ug snacks, lakip sa makuha sa mga runners sa ilang P300 nga registration fee mao ang usa ka grocery bag nga gisudlan og San Miguel products nga nagbalor og P200.
Ang salapi nga matigom sa maong lumba ihatag usab ngadto sa mga beneficiaries sama sa Cebu City Task Force on Street Children, Operation Second Chance ug Mandaue Sto. Niño Foundation Scholarship Program.
Ang registration sugdan karong adlawa diha sa Casa Ilongga sa Robinsons, Runnr sa Ayala Center-Cebu ug Philippine Sports Commission (PSC) office. (BANATSPORTS)
- Latest
- Trending
