Cacoy Doce Pares "Hall of fame" awards

CEBU, Philippines - Moabot sa 100 foreign eskrimadors nga sakop sa Cacoy Doce Pares World Eskrima Federation ang modawat sa ilang pasidungog ngadto sa Hall of Fame sa nagkalain-laing kategoriya sama sa achievement award, martial arts legend ug most dedicated member atol sa awarding karong alas-7 sa gabii diha sa CAP Auditorium sa Osmeña Blvd., ning siyudad.

Pipila ka eskrimadors ang gihashasan sab aron makadawat sa ilang promosyon atol sa nahisgutang kalihukan, nga pagatambungan ni Cebu City Mayor Michael L. Rama pinasidunggang dinapit ug mamumulong.

Ang labing daghan nga nalakip sa listahan sa Hall of Famers karong tuiga mao ang sakop sa 15-man team gikan sa Australia nga maoy labing dakung delegasyon karong tuiga sa gipahigayon nga tulo ka adlaw’ng Cacoy Doce Pares Mixed Martial Arts seminar and demonstrations nga giuloha'g "The Gathering" diha sa E-Mall Activity Center.

Ang nahisgutang seminar matapos ugmang adlawa.

Ang mga Australian Grandmasters nga sila si Vince Palumbo ug Chris Nasilowski nga parehong nanag-iya og martial arts schools didto sa Adelaide, southern Australia makadawat og award uban sa American   Grandmasters nga sila si Richard Bustillo ug Anthony Kleemans.

Ang usa sa mga babayeng eskrimador nga modawat og pasidungog isip Hall of Famer sa labing unang higayon mao si Dianne Tanaka.

Ang 91-anyos nga si Supreme Grand Master Ciriaco 'Cacoy' Cañete maoy mibukas sa tulo ka adlaw nga seminar/ demonstration kagahapon sa buntag diin mihimo siya’g lecture alang sa eskrima techniques lakip ang pangamot or "barehand" sa pagdis-arma sa olisi sa kontra. (BANATSPORTS)