Cebu City Swimmers nanginhas og bulawan

CEBU, Philippines - Nagdan-ok na karon ang nahipos nga bulawan sa Team Cebu City (TCC) dihang ang ilang swimmers namingwit og 12 ka gold medals sa kinatibuk-an nilang 18 golds, 16 silvers ug walo ka bronzes human sa ikaduhang adlaw sa 2010 Central Visayas Regional Athletic Association (CVIRAA) Meet kagahapon didto sa Lorenzo G. Teves Memorial Aqua Centre sa Dumaguete City.

Ang host Dumaguete nga biya kaayo sa ikaduhang dapit adunay pito ka gold, upat ka silver ug pito ka bronze medals, samtang ang Cebu Province nalansang sa ikatulo sa ilang tulo ka gold, walo ka silver ug unom ka bronze medals.

Sila si Michael Ichiro Kong ug Lyh Ann Navarro mihakot og duha ka bulawan matag usa.

Si Kong maoy nanghawod sa 200m individual medley (2:48.61) ug sa 50m backstroke (35.92 sec), gisundan sa iyang teammate nga si Antonne Villahermosa sa oras nga 37.71 seconds.

Sa iyang bahin, si Navarro maoy nidominar sa 400m freestyle sa oras nga 5:32.54 ug sa 200m individual medley nga mi-oras og 2:54.92. Ang iyang kauban nga si Karen Indaya mitiltil og silver sa duha ka events.

Si Madelin Capacio nidaog sa 50m backstroke sa oras nga 38.05 seconds, samtang si Navarro napunta sa ikaduha sa oras nga 39.44. seconds.

Si Kirk Tristan Ebon maoy nidaog sa korona sa boys' division human mi-oras og 5:18.01, samtang si Michael Sasedor mitunol og gold sa 50m breaststroke nga mi-oras og 41.70 seconds.

Sa secondary division, si Cynth Jhune Goden mao ang nag-una sa 200m backstroke sa oras nga 2:49.64 seconds, samtang si John Michelson Beltran maoy hawod sa 200m individual medley uban sa iyang oras nga 2:36.69.

Si Anthony Navarro maoy labing kusog sa 200m backstroke, ug siya sab ang nigiya sa TCC pagkabkab og bulawan sa 4x100m medley relay uban nilang Ramsay Macawille, Brian Minerva ug Cristante Veloso.

Ang TCC mikabkab sab og bulawan sa 4x100m freestyle relay luyo sa mga paningkamot nilang Maynard Sasedor, Israel Gabunada, Keith Ocampo ug John Beltran.

Sa pikas bahin, ang TCC nidominar sab sa 4x100 freestyle relay kortesiya nilang Trina Caneda, Joyce Huguete, Kaitlin Capacio ug Lorens Goyenechea. – BANAT NEWS