CEBU, Philippines - Parehong nagtinguha sa ilang ikaduhang kadaugan ang Ave Maria Sanctuary Park-Team A ug ang University of the Visayas (UV) Green Lancers nga mag-ilog sab sa liderato sa Carcar Mayor’s Cup Open basketball tournament karong adlawa didto sa Carcar Sports Complex.
Buot sa Ave Maria-Team A nga mobawos sa kapildihan sa ilang sister team Ave Maria-Team B, kinsa gipilde sa Lancers sa double overtime atol sa opening game niadtong Huwebes sa gabii.
Ang Ave Maria-Team B nga gipangulohan ni Manny Gabas, midaog batok sa Talisay City-based Colis sa miaging gabii, 101-98 pinaagi gihapon sa overtime. Si Gabas mipugnit og 24 puntos alang sa Ave Maria- Team A, samtang si Bobby Hatague midugang og 20 puntos.
Ang ex-Lancer nga si Rene Toring mihakot og 23 puntos aron pangulohan ang pilderong Colis. (BANATSPORTS)