Arnis tournament sa Lapu-Lapu City

CEBU, Philippines - Mosikad na karong adlawa ang labing dakung arnis tournament diha sa Lapu-Lapu City Auditorium.

Gipasiugdahan sa Lapu-Lapu Eskrima Alliance, ang torneyo nga suportado sa World Eskrima Kali Arnis Federation (WEKAF) ug sa Doce Pares, usa lamang sa mga kalihukan alang sa tinuig nga pangilin sa maong dakbayan.

Magsilbe usab kini nga first qualifying round alang sa 3rd World Doce Pares Championships nga ipahigayon dinhi sa Sugbu unya sa Hulyo 22-23 sunod tuig.

Ang presidente sa maong kahugpongan nga si Engr. Julito Cuizon mibutyag nga aduna nay kapin sa 20 ka eskrima clubs lakip na ang bag-ong natukod nga ALU-TUCP ug Big Foot Arnis Clubs ang mipadayag sa ilang partisipasyon.

Lain pang mga entrante ang sayong nipadayag mao ang mga magduduwa gikan sa Parian, Inayawan, Labangon, Mambaling, Mandaue, Abellana National School, Southwestern University, Mandaue City Comprehensive National High School, Mabolo Eskrima Team, Lapu-Lapu Martial Arts, San Miguel Eskrima, RR de Combate, Banilad Eskrima, San Fernando, Cubacub Martial Arts ug ang Kauswagan Self Defense Brotherhood (KSDB) Eskrima.

Ang tunga sa adlaw nga torneyo pasiunhan sa Form (Sayaw) competition sa alas-12 sa udto ug matapos sa alas-6 sa gabii.

Niadtong interesadong mosalmot, mahimong mokontak ni tournament chairman Grandmaster Isidro Casio ug mahimong motawag sa 346-0433 ug 344-3028. (BANATSPORTS)