2010 Smart karate kids tournament mosikad na

CEBU, Philippines - Dul-an sa 300 karatekas gikan sa Visayas ug Mindanao ang mopakita sa ilang abilidad sa 2010 Smart Karate Kids Tournament nga mosikad karong adlawa diha sa Parkmall sa north reclamation area.

Dili lang aron makakuha og gold, kun dili ang kahigayonan nga malakip sa line-up sa National team nga moduwa sa 2012 Asian Karatedo Federation Cadet and Junior Championships diin ang Pilipinas maoy host.

"Magsisilbe itong try-out para sa mga promising karatekas sa Visayas at Mindanao, kung saan ang makukuha naming talent ay isasailalim sa training doon sa Maynila para maging gold medal prospect para sa bansa," matud pa ni David Lay Jr., head coach sa Philippine Team atol sa press conference kagahapon didto sa Chikaan sa Parkmall.

Sa iyang bahin si Raymund Lee Reyes, secretary-general sa Philippine Karatedo Federation, nagkanayon nga sa dakung suporta sa Smart Communications, masaligon siya nga magmalampuson ang duha ka adlaw nga torneyo, sama sa Manila leg didto sa Sta. Lucia Grand Mall sa Marikina.

Ang torneyo nga salmotan sa mga karatekas nga nag-edad   og 12-anyos ngadto sa 21-anyos magsangka sa kata ug kumite categories.

Gawas sa mga karate school dinhi sa Sugbu, modagsa usab ang mga karatekas gikan sa Dumaguete, Cagayan de Oro ug Zamboanga. – BANAT NEWS