Binukbukay karong gabii sa Gaisano Countrymall

CEBU, Philippines - Usa ka dosenang paresan sa amateur boxing prospect ang magbinayloay og kumo sa laing edisyon sa Summit Fight Night Amateur Series karong gabii diha sa Gaisano Countrymall carpark.

Sa main bouts sa 57 kgs. division, si Eleno Traya sa Consolacion makigharong ni Ryan Cagatulla sa Phil-Australia Boxing Club, samtang magharong ang out-of-towners nga sila si Ronel Abing sa Tagbilaran City ug Jan Ivor Lastrilla sa Tacloban City.

Makigsinukliay sab og kumo si Reovenyl Santillas sa Flores Boxing Club batok ni Raymund Tabogon sa Misamis Oriental sa 54 kgs. class ug si Jason Pasignasigna sa Talamban makigbinukbukay ni Sherwin Caday sa Sanai Boxing Club.

Si Richard Barrios sa Bais City mohamag   ni Jimboy Mayang sa Bacolod sa 48 kgs., samtang sila si Rechie Montealto ug Cherwellan Cantel sa Maguikay National High School magtigi sa 46 kgs.

Ang teammate ni Caday nga si Eford Pesales makigsangka ni Mark Kevin Sereño sa Flores Boxing Club sa 45 kgs.

Tulo ka boksidor sa Phil-Australia Boxing Club nga sila si Jeffrey Stella, Raymund Tuñacao, Kent Mike Tuñacao mopakita sab sa ilang katakus batok nila ni Polid Banal sa Cabancalan, Romel Tuñacao sa Florex Boxing Club ug Vicente Seos-e Jr. sa Cabancalan.

Si Rame Casañares sa Banilad Elementary School manalipod sa iyang balwarte batok ni Jegmark Longakit sa Maguikay sa ilang sangka sa 27 kgs. ug si Dominique Casañares sa Pit-os makigbinukbukay ni Mark Besinga sa Cabancalan sa 22 kgs. class. – BANAT NEWS