6 ka koponan nagpalista sa Open category sa Carcar Mayor's Cup
CEBU, Philippines - Unom ka koponan ang nipadayag sa ilang partisipasyon sa umaabot nga Carcar Mayor's Cup Open basketball tournament nga sugdan karong Nobiyembre 4 diha sa Carcar City gym.
Sa opening game, magsugat dayon ang dalan sa University of the Visayas (UV) Green Lancers ug sa Ave Maria Sanctuary Park nga bitoonan sa mga magduduwa gikan sa University of San Jose-Recoletos (USJ-R) Jaguars.
Lain pang mga koponan nga magsangka mao ang Southwestern University (SWU) Cobras, University of San Carlos (USC) Warriors, ACES ug ang Talisay City-based Colins.
Ang Argao team nga pangulohan ni ex-pro Jimwell Torion wala pa nakahukom, apan si commissioner Julie Flores miingon nga ilang dawaton ang ilang entry ngadto sa Open division nga mosubay og double eliminaton format. Nagpasabot nga ang team nga mapilde og kaduha matagak na.
Ang matag team gitugotan nga makakuha'g 15 ka players ug mahimong makapaduwa og ex-varsities.
Ang open category, usa sa mga kategoriya sa nagpadayong Carcar Mayor's Cup nga gipangulohan ni chairman ug Mayor Neci Apura.
Ang laing tulo mao ang SK, under 21, 35-year old above ug ang Local Division, nga alang lamang sa mga residente sa Carcar.
Karong Nobiyembre 5, ang Warriors moduwa batok sa Aces, ug inig ka ugma, ang Cobras moduwa batok sa Colis, ang third placer sa bag-o lang natapos nga Talisay Mayor's Cup.
Ang champion team makadawat og P50,000 ug ingon man tropeyo, ang second placer makaangkon og P30,000 ug ang third placer mobulsa og P20,000.
Gawas sa basketbol, ang Carcar sports festival nga gitukod ni Mayor Apura ug kaubanan sa konseho nga naglakip ni sports committee chairman councilor Jayson Fernandez, naglakip sa motocross, volleyball, softball, lawn tennis, badminton, billiards, chess ug air rifle shooting.
Ang Carcar sportsfest magsilbeng lamas sa kapistahan sa ilang mahal nga patron Sta. Catalina de Alejandria karong Nobiyembre 25. (BANATSPORTS)
- Latest
- Trending