CEBU, Philippines - Agi'g sukli sa paghatag og dungog sa siyudad, ang kagamhanan sa dakbayan sa Mandaue mohatag og cash incentives niadtong mga sakop sa Team Mandaue nga naka-medal sa bag-o lang natapos nga 2010 PLDT-ABAP Visayas Area Amateur Boxing Championship didto sa Mandaue City Plaza Square.
Kini ang gibutyag ni Mandaue City Sports and Development Commission Executive Director Hidelito Pascual sa The Freeman, igsuong mantalaan sa Banat News.
Ang Mandaue milampos pagpanalipod sa ilang teritoryo dihang ilang gisakmit ang overall championship pinaagi sa paghakot og lima ka gold , tulo ka silver ug duha ka bronze medals.
Sila si Kevin Jake Cataraja, Albert Pagara, Eleno Traya, Dannlou Codilla ug Michael Lorenz Romarate mao ang nikabkab og gold medals alang sa Team Mandaue, samtang sila si Melvin Besinnga, Reoxyl Tabogon, Mark Vincent Bernaldez mitunol og silver ug sila si Robert Etorma ug Christian Apawan mihatag og duha ka bronze medals.
Wala pa hinuon mahingpit sa konseho sa Mandaue kun pila ang ihatag sa matag medalist.
Si Mandaue City Councilor Daddie Suico, kinsa mao ang nangunay pagpasar sa resolusyon nagkanayon nga na-aprobahan na kini ug ang gihuwat na lang kun kanus-a mogawas ang mando aron mahatagan na ang mga amateur boxers sa ilang dugang ganti.
Atol sa awarding ceremonies sa labing dakung boxing tournament sa Kabisay-an nga gipasiugdahan sa ABAP, ang tanang gold medalists nakadawat og P1,000, ang silver medalists nakadawat og P700, samtang ang bronze gihatagan og P500.
Gawas sa nindot nilang gipakita sa ABAP Visayas Tournament, makadawat usab og laing cash incentives sila si Bernaldez, Romarate, Paraga ug Codilla sa malampuson nilang kampanya sa miaging Tinga Cup National Invitational Tournament didto sa Manila. (BANATSPORTS)