Una sa tanan, maayong pagbakasyon mga tirador! Pag-amping sa inyong mga biyahe ug ayaw kamo paghurot sa pag-adto sa sam-ang aron pagbisita sa mga mahal sa kinabuhi nga mitaliwan na kay basin pagbalik ninyo sa inyong balay hurot na ang mga gamit.
* * *
Karong nagkaduol na ang sangka ni Manny Pacquiao batok ni Mexican Antonio Margarito dili na nato ni biyaan og dukdok aning atong lindog.
Si Pacquiao atua na sa Wild Card Gym ni Freddie Roach mag-training, apan bisan pa man niini wala gihapon malikayi ni Pacman ang pagtambong sa ubang kalihukan gawas sa iyang training.
Matud pa, nga mi-coach siya og usa ka basketball tournament didto ug late nang miabot sa iyang praktis. Dili sa pag-ingon, apan gikulbaan ko sa mga gipakita sa atong idolo sa boksing karon.
Nawala na ang Pacman kaniadto nga sa mata pa lang, makita na ang konsentrasyon niini sa umaabot niyang mga sangka. Apan karon wala ko makabantay niini sa mga pictures ug sa mga interbyu kaniya sa telebisyon.
Hinuon dili nato mabasol si Pacquiao, kay dili na kini susama kaniadto nga uhaw siya sa fame o kasikat, dili pa siya kaayo kaniadto adunahan, ug wala pa masulod sa pagka-politiko.
Kun buot sumadahon, naa na kang Pacman ang tanang gipangita sa mga tawo karon ug naghinobra pa gani. Karon ang akong nakita kaniya mao nalang ang kauhaw nga magpabilin ang garbo sa mga Filipino sa natad sa boksing. Unta paigo na kini aron tumbahon ug modaog siya batok kang Margarito.
“Hunger is a great motivation,” matud pa.
Si Margarito nakabentaha og dul-an unom ka pulgadas kumparar kang Pacman, mas lapad ug baga ang lawas, mas bug-at, mas uhaw sa kahigayonang maoy unang Mehikanong makaputol sa 12 winning streak ni Pacquiao.
Tungod sa gidak-on nakasiguro ko nga makig-‘biltobil’ ni si Margarito kang Pacman. Nanganti ra ba siya nga iyaha gyung suwayan og hangtod asa ang makaya sa Pinoy sa sayo palang nga round. Kuyaw ni kun sugalan ni Pacquiao, una presko pa si Margarito, daku ug labaw sa tanan dili sad baratuhon ang kinumo.
Syurbol hinuon ko nga sa unang mga rounds, mas daghan na og malabay nga kumo si Pacman kang Margarito, ang pangutana kun duna ba kini epekto sa gibansagang Tijuana Tornado.
Sa maong sangka karong Nobiyembre 14, walay mawagtang kang Margarito kun mapilde man kini. Kay si Pacquiao gud makaingon ta nga lupig gyud si Margarito kay 7-weight division champion ang iyang nakaatubang. Ikaduha, hinay gyud siya kumparar sa Pinoy ug uban pa.
Apan kun si Margarito maoy modaog, sus, puwerteng daghana sa oportunidad nga nagpaabot alang kaniya. Siguradong maglinya ang buot nga makigsangka, gawas lang kun dunay mahitabong rematch tali nila ni Pacquiao.
Samtang sa Pacman (simbako lang!) hinay-hinay nang malaya ug mawagtangan na og mga prospects aron makakuha og away sa mga dagkung pangalan.
Ingon man niini gyud ang boksing kun makit-ang mihinay na ka maglisod na ka og bawi sa imong naandang kasikat.
* * *
Atol ning pagsulat, mosaka sa ring sila si AJ 'Bazooka' Banal, Mark Melligen, Jason Pagara ug uban pa alang sa Pinoy Pride boxing card diha sa Waterfront Cebu City Hotel and Casino batok sa ilang mga langyaw’ng kaatbang. Good luck!
* * *
Ako diay gipahibalo sa atong mga kaigsuonan sa Alpha Sigma Omega nga mitugot na ang kadagkoan sa The Freeman Foundation sa plano nato nga moabag sa ilang kalihukan karong Pasko. Palihog ko og kontak kang Brod Intsik o ba kaha kang Brod Leland o si Brod Reggie ug Brod Ramsa.
* * *
PAGTULON-AN: Daghang mga maayong ideya ang wala na gyud mahitabo o mabuhat tungod kay ang nakahuna-huna niini nahadlok nga kataw-an sa uban.
* * *