Express ipinagpag ng Energy Boosters
MANILA, Philippines - Kasabay ng pagpigil sa kanilang two-game losing skid, winakasan naman ng Energy Boosters ang dalawang sunod na ratsada ng Express.
Nagtayo ng isang 24-point lead sa third period, giniba ng Barako Bull ang Air21, 89-79, tampok ang conference-high 23 points at 7 rebounds ni Mark Isip, sa elimination round ng 2010-2011 PBA Philippine Cup kahapon sa Big Dome.
Nagtabla sa 2-3 rekord ang Barako Bull at Air21 kasama ang Meralco, Powerade at Rain or Shine sa ilalim ng San Miguel (4-1), Talk N Text (4-1), Barangay Ginebra (3-2) at Alaska (3-2) kasunod ang nagdedepensang Derby Ace (1-4).
Matapos kunin ang first half, 46-33, pinalobo ng Energy Boosters sa 24 puntos, 61-37, ang kanilang lamang bago nakadikit ang Express sa dulo ng final canto.
Nagdagdag sina Sunday Salvacion at Aries Dimaunahan ng 15 at 13 points, ayon sa pagkakasunod, para sa Barako Bull, habang may 14 naman si Ronjay Buenafe para sa Air21 kasunod ang 13 ni Carlo Sharma at 10 ni Josh Urbiztondo.
Samantala, magtatagpo naman ang Beermen at ang Llamados ngayong alas-4:50 ng hapon kasunod ang salpukan ng Bolts at Tigers sa alas-7:30 ng gabi sa Big Dome.
.
- Latest
- Trending
