USJ-R nagpabiling walay pilde
CEBU, Philippines - Mikawhat og laing daog ang University of San Jose-Recoletos (USJ-R) Spiking Jaguars human nila gipatikangkang ang Ateneo de Manila University (AdMU) Eagles aron magpabiling walay pilde sa volleyball event sa University Games 2010 kagahapon didto sa Silliman University sa Dumaguete City.
Ang CESAFI men's volleyball grandslam champion mipilde sa Ateneo sa straight sets, 25-16, 25-14, 25-22 alang sa ilang ikatulong sunod-sunod nga daog.
Ang USJ-R ni legendary coach Grace Antigua laraw nga moharos sa upat ka duwa sa elimination round sa dihang ilang batukan ang De La Salle-College of St. Benilde.
Modaog o mapilde, ang USJ-R seguro na nga makakuha og lingkoranan sa quarterfinals.
Sa laing duwa sa men's category, ang University of San Carlos (USC) ni coach Norvie Labuga mipukan sa Rizal Technological University (RTU), 17-25, 25-22, 25-21, 25-22, apan nasugamak sila ngadto sa University of Negros Occidental-Recoletos (UNO-R), 25-17, 27-25, 23-25, 25-13, 15-10.
Sa women's division, nahanaw ang damgo sa two-time CESAFI titlist Southwestern University (SWU) Lady Cobras nga moabante sa sunod hugna dihang miyukbo sila ngadto sa University of St. La Salle, 25-19, 21-25, 25-22, 25-21.
Sa laing duwa, ang USC Lady Warriors napilde ngadto sa National University, 25-17, 25,21, 25-21, apan may purohan pa silang moabante sa quarterfinal round kun ilang mapilde ang University of Sto. Tomas (UST) Tiegresses karon. (BANAT NEWS)
- Latest
- Trending
