USA, Turkey parehong gisugat og daog

CEBU, Philippines - Parehong gisugat og daog ang defending champion USA ug Turkey sa pagbukas sa 2010 Cebu United Bankers Association (CUBA) Christmas Basketball League diha sa Capitol Parish Gym, Escario Street, ning siyudad.

Bisan pa og nahutdan sila sa kusog sa nanghinapos nga bahin, nakalingkawas gihapon ang Team USA sa usa ka 80-73 nga kadaugan batok sa Lithuania, samtang gidabo-dabohan usab sa Turkey ang Serbia sa iskor nga 84-64.

Ang USA sa pagpangulo ni Bong Bacalla mipakita sa ilang pagkadominante sa first period pinaagi sa 26-9 nga labaw, apan mihinay-hinay pagsikit kanila ang Lithuania nga milaslas sa labaw ngadto na lang sa siyete puntos, 49-56, sa third period.

Apan nakawang lang ang paningkamot sa Lithuania tungod kay nakuwangan sila sa oras ug nailog sa USA ang labaw nga misukol sa pinuntosay hangtod sa final buzzer.

Sa sayo pa, usa ka 13-point scoring run ang gipabuto sa Serbia batok sa Turkey, apan imbes nga hingpit nga biyaan, nabali na hinuon ang resulta sa duwa dihang sila maoy giukoban sa Turkey.

Gikan sa dos puntos nga biya, 34-36, giilog sa Turkey ang labaw human sa 30-10 run nila ni Christopher Osorio ug Edgar Olalo alang sa 18 point lead, 64-46, sa second half. 

Ang liga hugtanon sab nga gipaluyohan sa Alberto's Pizza  (BANATSPORTS)