Eco Dash: The Bottle Run gikatakda

CEBU, Philippines - Luwason ang kinaiyahan ug pagtukod og mga tunghaan pinaagi sa running maoy tumong sa ipahigayong Eco Dash: The Bottle Run karong Nobiyembre 14 diha sa The Terraces sa Ayala Center-Cebu. Lahi sa mga miaging environmental run, ang Eco Dash nga gipasiugdahan sa My Shelter Foundation ug Ayala Center Cebu, misaad og hinanaling aksiyon sa giatubang nga problema sa tibuok kalibutan nga mao ang "climate change."

Isip usa sa ilang major project nga anhi sugdan sa Sugbu, si Illac Diaz sa My Shelter mopasiugda og pagpangolekta'g mga botelya pinaagi sa maong lumba nga maoy ilang gamiton aron motukod og duha ka tunghaan didto sa Bantayan Island.

"This is the time we bring this new technology that can save natural resources and in the same time making shelter and school for our community here in the Visayas," matud pa ni Diaz atol sa news conference kagahapon didto sa Laguna Café sa The Terraces.

Gawas sa registration fee, ang mga partisipante kinahanglan sab nga magdala og duha ka basiyong 1.5 o 2 liter plastic bottles atol sa ilang pagparehistro.

Ang registration fee nagkantidad og P500 alang sa 10K, samtang P350 sa 5K ug 3K run.

Sa maong kantidad, libre na ang singlet ug snacks.

Ganting salapi ang nagpaabot sa top finishers sa matag kategoriya.

Human sa lumba, adunay raffle diin ang mga partisipante adunay kahigayonan nga modaog og digital camera, Timex watch, Ipod shuffle ug mga tiket alang sa Manny Pacquiao-Antonio Margarito showdown diha sa Ayala Cinema. 

Niadtong buot mosalmot, mahimong magpalista sa Ayala Center Cebu Concierge, Runnr, ROX ug Planet Sports. – BANAT NEWS