Lastrilla mipaundang ni Casenillo

CEBU, Philippines - Milungtad lang og 10 segundos sa mga kamot ni John Ivor Lastrilla ang iyang kontra nga si Richard Casenillo sa Summit Natural Drinking Water Fight Night Amateur Series niadtong miaging gabii diha sa Gaisano Country Mall carpark.

Si Lastrilla sa Team Mandaue, wala mohatag og kahigayonan nga makaporma ang pambato sa Phil-Australian Boxing Club (PABC) nga si Casenillo dihang mipatugpa kini og usa ka makabungog nga right hook sa tampihak niini.

Sa kakusog sa maong suntok, natumba si Casenillo ug wala na makarekober nga nakapaaghat sa referee sa paghunong sa away.

Gawas ni Lastrilla, midaog usab pinaagi sa referee stoppage sila si Rhiyan Canillas ug Raymond Namucatcat batok sa kauban ra sab nila nga boksidor sa Mandaue. 

Si Canillas nangayo lang og 25 segundos aron paundangon si Robert Etorma sa 63 kgs. division, samtang si Namucatcat mipaluhod ni Elecio Taruc sud sa 45 segundos sa round 1 ubos sa 46 kgs. division.

Laing unom ka boksidor sa Mandaue ang mirehistro sab og daug batok sa ilang teammates nga naglakip nila ni Mark Bernaldez (60 kgs.), Christian Apawan (54 kgs.), Cherwellan Cantel (46 kgs.), Danlou Codilla ug Ferde San Roque (48 kgs.) ug Albert Pagara (52 kgs.).

Midaog sab si Riel Muñez sa Florencio Urot National High School human nila kulataha si Reyboy Pepito, si Rodel Wenceslao sa PABC mipilde ni Robert Labanza sa Team Mandaue, si Jaybon Hondos sa Davao midaog batok ni Richard Barrios sa Bais City sa 46 kgs. division. – BANAT NEWS