CEC vs. SHS sa juniors Finals

CEBU, Philippines - Ang top two seeded teams nga Cebu Eastern College (CEC) Dragons ug ang Sacred Heart School-Ateneo de Cebu Magis Eagles maoy mag-abot sa best-of-five championship series sa Cebu Schools Athletic Foundation, Inc. (CESAFI) juniors division ugmang adlawa diin ang ilang pag-abante sa finals hingpit nga nakapa-usab sa hulagway sa siyam ka tuig nga kasaysayan sa lega tungod kay pareho silang mi-abante sa finals sa labing unang higayon.

Human sila maka-eskapo batok sa University of the Visayas (UV) Baby Lancers kaniadtong Sabado aron mo-iskor og 87-83 nga kadaogan sa overtime, ang Magis Eagles kinsa maoy bugtong team nga mipukan sa Baby Lancers sa duha ka higayon, mikawras sa Dragons aron mo-iskor og 84-79 nga upset aron mobawos sa ilang 70-87 nga kapildehan kaniadtong Hulyo 31 ug mi-abante sa finals. Hinoon, bisan pa sa ilang kapildehan nga nagbaraw sa ilang laraw aron moharus sa semifinals sa 3-0 nga baraha, mi-abante lang gihapon ang Dragons sa finals ug sila gihapon maoy title favorite isip no. 1 qualifier.

Si Adven Jess Diputado kinsa maoy bayani dihang midaog sila batok sa Baby Lancers kaniadtong Sabado diin ang iyang tirada maoy naghatud sa duwa ngadto sa overtime, mipugnit og 23 puntos aron pangulohan ang Magis Eagles ug sila si Adrian Roland Mulller, Bradley Bacaltos ug Julius Salvador Cadavis pulos sab midugang ug double figures.

Ang Magis Eagles wala makapugong ni Nike Montalvo apan ilang napugngan ang laing CEC scorer nga si James Neill Sumayang kinsa igo lang nakaamot og 11 puntos. Sa laing duwa, midaog ang UV Baby Lancers ug nakalihay sa pagharus unta sa ilang mga kontra dihang mi-iskor sila og 100-94 nga kadaogan batok sa Junior Webmasters sa overtime apan dili kini igo aron dad-on sila ngadto sa finals tungod kay igo na lang silang makigsangka alang sa ikatulong pwesto batok sa ilang biktima. Si Michael Smith maoy nangu sa Baby Lancers sa iyang 31 puntos samtang si Alvin Labolabo mihakot og 25 puntos alang sa Junior Webmasters.

Sa collegiate division, mibalik sa finals ang UC Webmasters apan ning pagsuwat sa alas 6:30 sa hapon, wala pa mahibaw-i kung kinsay ilang ikabagat sa finals apan ang labing duol nga posibilidad mao gihapon ang UC-UV finals ug mahitabo lang nga dili sila mag-abot kung mapilde ang Lancers aron mahitabo ang UC-SWU sa labing unang higayon sa finals sa collegiate division.  (BANATSPORTS)