Violet, Ryle Trucking mi-ariya'g daog sa Sunday Club caging

CEBU, Philippines - Makabungog nga 38 puntos sa second quarter nakatabang sa Violet team pagmasaker sa Yellow, 114-93 sa nagpadayong duwa sa Phase 3 Camella Homes Sunday Club basketball tournament didto sa Villas Magallanes gym sa Lapu-Lapu City.

Gikan sa singko puntos nga biya sa first quarter, 29-34, ang Violet sa pag-alima ni Alan Sepe kalit nga miilog sa labaw sa second quarter human milusad og 38-14 aron tapuson ang halftime sa iskor nga 67-48 ug ning higayona nakakuha sa suporta nilang Alex Balderona ug Amay Palad nga nagkumboya'g 41 puntos.

Si Balderona mikadlit og 27 puntos, samtang si Palad mikulit og 14 puntos. Apan si Sepe maoy labing daku nga na-iskor pinaagi sa iyang 38 puntos.

Ang napukan nga Yellow gipangulohan ni Centes Brañanola, kinsa mibugha og 25 puntos, gisundan ni Dennis dela Pieza sa iyang 23 puntos ug nila ni Rolly dela Pieza ug Bebot Pleños nga parehong misansan og 13 puntos.

Sa laing duwa, nausik lang ang 41 puntos nga namugna ni Allen Diñola gumikan kay ang iyang team nga Rollway Freighters napukan ngadto sa Ryle Trucking, kinsa miariya og   98-103 nga kadaugan.

Puntos Matag Usa

Unang duwa:

VIOLET (114) - Sepe 38, Balberona 27, Palad 14, Maratas 8, Sumilang 7, Rabi 7, Villapez 6, Rodriguez 5, Geraldez 2

YELLOW (93) - Brañanola 25, D. Dela Pieza 23, R. Dela Pieza 13, Pleños 13, Tongol 6, Almacin   6, Aparente 5 , Cortes 2

Ikaduhang duwa:

RYLE (103) - Brañanola 22, Delos Angeles 16, Sanchez 11, Dela Pieza 10, J. Palad 10, Oyanib 9, Catampatan 5, A. Palad 3, R. Dela Pieza 2

ROLLWAY (98) - Diñola 41, Andrino 20, Ocon 15, Albeos 14, R. Dela Pieza 6, Abel 4. – BANAT NEWS