2nd National Milo Little Olympics buksan na didto sa Cagayan de Oro

CEBU, Philippines - Pipila ka oras gikan karon, magpunsisok na ang liboan ka mga atleta lukop nasud alang sa grand opening sa 2nd National Milo Little Olympics karong gabii didto sa Don Gregorio Pelaez Sports Center sa Cagayan de Oro City.

Ang defending champion Team Visayas nga sagad gilangkuban sa mga Sugbuanong atleta, mosugod na og kampanya alang sa ilang sunod-sunod nga overall championship title sa elementary ug secondary divisions ning tulo ka adlaw nga sports conclave.

“This year we have molded quality athletes who are combat-ready because we would like to defend our title. I’m confident with Team Visayas especially in the ball games basing on their performances in the regional games and they had the ample time to practice in preparation to this competition,” matud pa ni Team Visayas regional executive director Ricky Ballesteros.

Mismo ang CEO sa Nestle Philippines Inc. nga si John Miller motambong atol sa opening uban ni Senador Aquilino Pimentel jr.

Usa sa mga highlights sa opening ceremonies mao ang pormal nga pagtunol sa torch gikan ni Cebu Governor Gwendolyn 'Gwen' Garcia ngadto ni Misamis Oriental Governor Oscar Moreno. Kahinumduman, ang Cebu maoy mi-host sa inaugural MLO National sa miaging tuig. – BANAT NEWS