Ormoc runners modagan sa Eagle Run "Night Race"

CEBU, Philippines - Mga bisitang runners gikan sa Ormoc City ang mosalmot sa 2010 Eagle Run-“Night Race” karong Sabado sa gabii diha sa Cebu Doctors' University main campus sa north reclamation area, Mandaue City.

Ning pagsulat, may 1,200 na ka runners ang nagpalista sa maong lumba nga magsilbeng second leg sa Eagle Run nga gipasiugdahan sa Sacred Heart School-Boys Batch '85, diin usa sa ilang mga alumni mao ang international marathoner ug nabantog nga eye doctor nga si Dr. Yong Larrazabal.

Gawas sa Ormoc nga mopadala og 70 ka runners, managan usab ang 200 ka mga sakop sa Philippine National Police ug laing 50 gikan sa Visayan Electric Company (VECO).

Ang lumba gibahin sa tulo ka kategoriya nga mao ang 10K, 5K ug 3K run.

Ganting salapi ug medalya ang madawat sa mga mananaog sa matag dibisyon.

Ang mga runners may kahigayonan sab nga modaog atol sa raffle inig human sa lumba.

Lakip sa ripahon mao ang leaf side chair collection ni international designer Kenneth Cobonpue nga nagkantidad og $800, cellphones ug uban pa.

Aduna kini registration fee nga P300 ug niadtong interesado, mahimong magparehistro   sa Nike Athletic Club sa Banilad Town Centre, Dessert Factory sa Ayala Terraces ug Center for Sight sa Cebu Doctors’ Hospital.