Team Bisdak andam na manalipod sa overall title

CEBU, Philippines - Mogikan na karon paingon sa Cagayan de Oro ang defending champion Team Bisdak aron didto manalipod sa ilang overall title sa 2010 Milo Little Olympics National Championship karong Oktubre 15-17.

Ang Team Bisdak nga maoy morepresentar sa Visayas region langkuban sa mga piniling atleta sa Sugbu ug mga gold medal prospect gikan sa Dumaguete ug Bohol.

 "We are confident that we can maintain it. We got more time to prepare for this meet," matud pa ni Ricky Ballesteros, kinsa maoy nakapahimugso sa Team Bisdak.

Atol sa inaugural staging sa national championships sa miaging tuig diha sa Cebu City Sports Center, ang Team Bisdak misaad nga ipabuhagay ang tanan nilang kusog aron dominaron ang labing dakung junior sports event sa nasud.

Hinuon, wala kaayo kapakita og nindot nga performance ang Bisdak sa taekwondo, swimming ug athletics nga maoy nakapaaghat ni Ballesteros nga dasigon ang mga coaches nga doblehon ang ilang paningkamot.

Sama sa miaging tuig, ang volleyball, sipa, sepak takraw ug table tennis mao ang mga event nga gilaumang haruson sa   Bisdak.

Mokompleto sa sporting events sa Milo Nationals mao ang tennis, chess, badminton, gymnastics ug scrabble. – BANAT NEWS