Domingo vs. Malinga sa title eliminator

CEBU, Philippines - Nadungog na gyud ang dugay nang “break” nga gi-ampo ni bantamweight prospect Michael Domingo human mipirma og kasabotan ang ALA Promotions ug Branco Sports Promotions alang sa IBF eliminator sa ALA Boy karong Oktubre 30 didto sa South Africa.

Si Domingo (40-14-2, 18KOs) makigsangka ni South African Vusi Malinga (19-3-1, 12KOs) alang sa katungod nga moaway sa world title.

Katapusang nidaog si Domingo niadtong Abril diha sa Waterfront Cebu City Hotel and Casino pinaagi sa pagtumba ni Luis Melendez, ang boksidor nga mitapos sa karera ni Z Gorres.

Ang lumad nga taga-Sultan Kudarat nga si Domingo una nang giparang batok sa Indonesian nga si Angky Angkota didto sa Dubai, apan gi-itsapuwera sa ALA Promotions human sila makadawat og mas dakung tanyag alang sa usa ka IBF eliminator alang ni Domingo.

Ang kadaugan sa ranked No. 6 sa IBF nga si Domingo batok ni ninth-ranked   Malinga maoy maghatag og kahigayonan sa Pinoy boxer nga mosangka alang sa world title.

Grabeng pisikal ug mental nga kusog ang gikinahanglan ni Domingo tungod kay gawas nga mo-away siya sa balwarte sa iyang kontra, nailhan usab nga usa ka delikadong knockout artist si Malinga, kansang bugtong knockout nga kapildihan nagagikan ni kanhi WBC champion Hozumi Hasegawa sa Japan.

Si Domingo gikatakdang mobiya paingon ngadto sa South Africa karong Oktubre 24, ubanan siya sa ALA Gym chief trainer Edito Villamor, assistant trainer John Rey Bunao ug ALA Promotions public relations head Chad Cañares.   – BANAT NEWS