Tiwason kaha sa UC

CEBU, Philippines - Lab-as pa gikan sa ilang 81-61 nga kadaugan sa Game-3 nga naghatag kanila'g 2-1 nga bentaha sa series, ang University of Cebu (UC) Webmasters walay laing tumong kun dili ang paglangkat sa korona karong gabii dihang ilang sangkaon ang nine-time champion University of the Visayas (UV) Green Lancers sa Game-4 sa 10th Cebu Schools Athletic Foundation Inc. (CESAFI) basketball finals diha sa Cebu Coliseum.

Ang bugtong duwa gikatakda sa alas-5 sa hapon.

Ang presensiya ni "undergoal terror" Junemar Fajardo maoy nakapahimo sa ubang Webmasters nga offensive threats tungod kay walay Lancers nga nakapugong kaniya.

Lisud na kaayong pugngan si Fajardo kun makapuwesto na kini ilabi na gyud kun maayo niya pagkadawat ang entry pass down sa ilawom nga segurado gyud makapuntos. 

Si Fajardo mihagdaw og 32 puntos uban ang duha ka blocks.

Nakadugang sa kalig-on sa starting five sa Webmasters mao si Edward Pao tungod sa iyang gitas-on ug gidak-on nga makadani og depensa gikan sa gawas ug dayong malibre si Fajardo sa ilawom ug kanunay'ng makakuha'g offensive ug defensive rebounds.

Laing rason mao ang presensiya sa ilang point guard nga si Quinton Brian Heruela kinsa usa ka prized catch atol sa offseason.   (BANATSPORTS)